విజయవాడలో దారుణం: వాటర్ బాటిల్ దొంగిలించాడని కొట్టి చంపారు!

విజయవాడ నగరంలో అత్యంత అమానవీయ ఘటన చోటుచేసుకుంది. కేవలం రూ. 20 విలువైన వాటర్ బాటిల్ దొంగిలించాడన్న నెపంతో తెలంగాణకు చెందిన ఒక వ్యక్తిని నలుగురు వ్యక్తులు అత్యంత కిరాతకంగా కొట్టి హతమార్చారు. పటమట పోలీస్ స్టేషన్ పరిధిలో అక్టోబర్ 18న రాత్రి జరిగిన ఈ దారుణ ఉదంతం ఆలస్యంగా వెలుగులోకి వచ్చింది. ఈ కేసుకు సంబంధించి పోలీసులు ఇప్పటికే నలుగురు నిందితులను అరెస్ట్ చేశారు.

పోలీసులు వెల్లడించిన వివరాల ప్రకారం, మృతుడిని తెలంగాణలోని నల్గొండ జిల్లాకు చెందిన సాయికుమార్ (33)గా గుర్తించారు. అతనికి భార్య, ఇద్దరు పిల్లలు ఉన్నారు. యాదాద్రి - భువనగిరి జిల్లాలోని ఒక ఫాస్ట్ ఫుడ్ సెంటర్‌లో గత ఆరు నెలలుగా పనిచేస్తున్న సాయికుమార్, పని నిమిత్తం విశాఖపట్నం వెళుతున్నానని చెప్పి ఇంటి నుంచి బయలుదేరాడు. అక్టోబర్ 18న తాను విజయవాడలో ఉన్నట్లు భార్యకు ఫోన్‌ ద్వారా సమాచారం అందించాడు.

అదే రోజు రాత్రి పటమట డొంక రోడ్డులోని ఒక పాన్ షాపు వద్ద సాయికుమార్ వాటర్ బాటిల్ దొంగిలించేందుకు ప్రయత్నించాడు. దీనిని గమనించిన ఓ పాల వ్యాన్ డ్రైవర్, పాన్ షాపులో పనిచేసే రవిశంకర్‌ను అప్రమత్తం చేశాడు. దీంతో ఆగ్రహానికి లోనైన రవిశంకర్, సాయికుమార్‌ను బయటకు లాగి విచక్షణారహితంగా దాడి చేయడం ప్రారంభించాడు. సమీపంలోని మద్యం దుకాణంలో పనిచేసే అయ్యప్ప కూడా ఇందుకు తోడయ్యాడు. వీరిద్దరూ కలిసి సాయికుమార్ చేతులను వెనక్కి విరిచి కట్టేసి, సమీపంలోని విద్యుత్ స్తంభానికి కట్టేసి కర్రలతో దాడి చేశారు.

దాదాపు రెండు గంటల పాటు సాగిన ఈ దాడిలో అనంతరం పోతన్‌శెట్టి నవీన్, సాయి ప్రణీత్ అనే మరో ఇద్దరు వ్యక్తులు కూడా పాలుపంచుకున్నారు. సాయికుమార్ ప్రాణాల కోసం వేడుకున్నప్పటికీ నిందితులు ఏమాత్రం కనికరించలేదు. తీవ్ర గాయాలతో సాయికుమార్ స్పృహతప్పి పడిపోవడంతో నిందితులు అక్కడి నుంచి పరారయ్యారు.

ఈ ఘటనపై సమాచారం అందుకున్న పటమట పోలీసులు తక్షణమే రంగంలోకి దిగి, సర్కిల్ ఇన్‌స్పెక్టర్ పవన్ కిషోర్ నేతృత్వంలో దర్యాప్తు చేపట్టారు. ఘటనా స్థలంలో లభించిన సీసీటీవీ ఫుటేజీ ఆధారంగా దాడికి పాల్పడిన నలుగురు నిందితులను గుర్తించి అదుపులోకి తీసుకున్నారు. నిందితులపై భారతీయ న్యాయ సంహిత (బీఎన్ఎస్) సెక్షన్ 103(1) కింద హత్య కేసు నమోదు చేసినట్లు పోలీసులు వెల్లడించారు.